Sihironi do Mcveşi: Nananena Lazuri

Nananena, nana-çkimişe na doviguri iptineri nena; ma, mtelis na moçinapams, golalveri do na mulun oraşi xinci. Ma, kiana do tabiathi ham nenate viçini. Kultura-çkimişi mtelli qodepe hemus meşumpulun. Ma, dido qai miçkin, nananena gomindunu na çinoba-ti gomindunasen. Muşeni-ki, şilya do şilya tzana doni çkinapa nananenate meulun; Lazuri nenate...

Lazuri na miçkin şeni mektebis qai notepe var ematcopu, çkva qai dulya var madziru do dido getcareli var matcqindu. Muşeni-ki, dominanti millethi do nenaşi etzozlapheri ren nena-çkimi. Ham lethapeşi mcveşi nena; Lazuri... Do, şuri na mişinaxams sihironi ar melodi steri gomixtams, gomağaren, gomatcaren. Bğarğalamthaşa "telafuzi vorsi var maxenasen-i vana nena elomasvasen-i pheya" ma-do var vimsifon. Ma ham nenaşi pharamiti do nanipete virdi! Guri otconi bgarape-muşi mignapun. İptineri oropaşi zithapek Lazurişi şilya do şilya tzaneri menceli-muşite gomiqaçes.

Andğa, nananena-çkimite oğarğalute, xalqi-çkimişi mcveşi kultura do tarixi-muşiti na voskuledinam komiçkin. Ama oğarğalu, ar nenaşi oskuledinu şeni var eintcen. Lazuri, ar xvala na iğarğalinen nena mot orthas, irdas do iqaphethanas ya do dido tzana ren vitsadeburt, viçalişamt. Ama, nananenate oslophuşi xarqi va ren do ham Lazurişi, kultura, sanathi do çkinapaşi nena oqvapuşi tzoxle endoli ren. Lazuri ren oxori doloxeni nena do ndğaşe ndğa izaifen, e do, haşopete mtsika mtsika ğurun. Çku-ti xe qoreri var viyondrit, "Lazuri Galendo Doguroni Fakulte" kogephtzopxit. Lazuri doguru na unon iri şqala oqoltu şeni dersepe internethis kogebdvit. Tcitha oraşi doloxe govurtaten.

Nenanenaşi bayrami gexvameri orthas do nenape-çkunis apelas.

* Türkçesi için tıklayın.

* Click for English